ပုဇွန်​ဖက်​ထုတ်​ပေါင်း

ဒီနေ့တော့ ခရီးသွားကအပြန် ပုဇွန်ဖက်ထုတ်ပေါင်းလေး ပေါင်းလိုက်တယ် စားလို့ကောင်းလွန်းတဲ့အတွက် မာမာပြင်ဆင်ပြီး ပေါင်းထားတဲ့ ဖက်ထုတ်ပေါင်းနည်းလေး ကရောသောပါး ရေးပေးလိုက်ပါတယ်ရှင်။

ပါဝင်ပစ္စည်းများ

• ပုဇွန်အခွံခွာပြီး သန့်စင်ပြီးသား - 350 g
• Wonton skin  - အရွက်၃၀ခန့် ready made အရွက်ကို သုံးထားပါတယ်
• အချိုမှုန့်  - လက်ဖက်ရည်ဇွန်း တ၀က်
• ဆား - လက်ဖက်ရည်ဇွန်း သုံးပုံတပုံ
• Mushroom soy sauce - ထမင်းစားဇွန်း တဇွန်း
• Corn flour - ထမင်းစားဇွန်း တဇွန်း
• ငရုတ်ကောင်းမှုန့် - လက်ဖက်ရည်ဇွန်း သုံးပုံတပုံ
• ကြက်သွန်မိတ် - အပင်ကြီးကြီး ၃ပင် (40 mlခန့်) ဓါတ်ပုံထဲမပါ
• ကြက်သွန်နီ - အနေတော် တစ်ဥ
• ကြက်သွန်ဖြူ - အမွှာကြီးကြီး နှစ်မွှာ
• မုန်လာဥနီ - အနေတော် တစ်ဥ
• ဂေါ်ဖီအကြမ်းဖတ် - နှစ်ဖတ်
• နှမ်းဆီ - လက်ဖက်ရည်ဇွန်း လေးပုံတပုံ
• ဆီ - ထမင်းစားဇွန်း ၂ဇွန်းခန့်

ပြင်ဆင်ပုံ

• ပုဇွန်အခွံခွာပြီး သန့်စင်ပြီးသားကို အသားကြိတ်စက်ဖြင့် ညက်နေအောင် ကြိတ်ထားပါ
• ကြိတ်စက်မသုံးပါက ဓါးနှင့် ခပ်နုတ်နုတ် ညက်နေအောင် စဉ်းပေးပါ
• ကြက်သွန်မိတ်ကို ရေဆေးပြီး လက်တဆစ်စာ အနေလောက် လှီးပေးထားပါ
• မုံလာဥနီကို အခွံခွာပြီး သေးသေးနုတ်နုတ်လေးတွေ လှီးပေးပါ
• ကြက်သွန်နီကို အခွံခွာပြီး ရေဆေးကာ ခပ်နုတ်နုတ် လှီးထားပါ
• ကြက်သွန်ဖြူကို အခွံခွာကာ ရေဆေးပြီး ခပ်နုတ်နုတ် စဉ်းထားပါ
• ဂေါ်ဖီကို ရေဆေးပြီး ခပ်ပါးပါးလေးတွေ လှီးပေးပါ
• ဇလုံတလုံးထဲမှာ ညက်နေအောင် ကြိတ်ထားသော ပုဇွန် ကြက်သွန်မိတ် ကြက်သွန်နီ ကြက်သွန်ဖြူ မုံလာဥနီ ဂေါ်ဖီ ဆီ ငရုတ်ကောင်းမှုန့် Mushroom soy sauce ဆား အချိုမှုန့် နှမ်းဆီ နှင့် cornflour တို့ထည့်ပြီး အရသာမျှအောင် ဇွန်းနှင့်မွှေပေးပါ

ဖက်ထုတ်ထုတ်ရန် ပြင်ဆင်ပုံ

• Wonton skin ကို တရွက်ယူပြီး အစာကို အလယ်တည့်တည့်မှာ လက်ဖက်ရည်ဇွန်း တဇွန်းစာလောက် ပုံပေးပါ
• Ready made  ခဲထားသော အရွက်ကို သုံးပါက အစာမထည့်ခင် နာရီဝက်လောက် ကြိုထုတ်ထားပေးပါ
• ရေခဲပျော်မှ တရွက်ခြင်း လွှာယူရ လွယ်ကူစေပါတယ်
• လက်ညိုးနှင့် လက်မကို အဝိုင်းလေး လုပ်ပြီး Wonton skin တရွက်ကိုယူကာ တင်ပေးပါ
• ထိုအရွက်ထဲကို အစာထမင်းစားဇွန်း တဇွန်းစာ ထည့်ပေးပြီး လက်မနှင့် လက်ညိုးကို ညှစ်ပေးကာ အစာများ အပြင်ကို မထွက်အောင် အသာလေး ဖိပေးပါ
• ထိုနည်းအတိုင်း အစာကို ကုန်အောင် ထုတ်ပေးပါ
• ထုတ်ပြီးသော ဖက်ထုတ်များကို တခုနှင့် တခုမကပ်စေရန် ခပ်ဝေးဝေးထားပါ
• ချက်ချင်း ပေါင်းမစားသေးပါက နာရီဝက်လောက် လေသလပ်ခံပြီးမှ အိတ်တလုံးထဲ ထည့်ကာထားပြီး သိမ်းပေးပါ
• ထုတ်ပြီးသွားသော ဖက်ထုတ်များကို စားနိူင်သလောက် ပေါင်းပြီး ပိုသောဖက်ထုတ်များကို ရေခဲသေတ္တာ အပေါ်ထပ်မှာ သိမ်းထားပြီး လိုမှထုတ်၍ မိမိနှစ်သက်သလို ကြော်စား ပေါင်းစား နိူင်ပါတယ်။

ပေါင်းရန် ပြင်ဆင်ပုံ

• မိမိစားနိူင်သလောက် ဖက်ထုတ်များကို ပေါင်းရန်အတွက် ပေါင်းအိုးဇကာထဲ ထည့်ပေးပါ
• ပေါင်းအိုး အောက်ခံ အိုးထဲကို ရေတဝက်လောက်ထည့်ပြီး ပူအောင်တည်ပေးပါ
• ရေနွေးအိုး အိုးပူလာတာနဲ့ဖက်ထုတ်ထည့်ထားသော ပေါင်းဇကာကို အဖုံးအုပ်ပြီး တင်ပေးပါ
• ရေနွေးအငွေ့တက်လာတာနဲ့ မီးကို အလယ်လောက်ထိ လျှော့လိုက်ပါ
• မီးအားအရမ်းပြင်းလျှင် ပေါင်းအိုးအောက်ခံ အိုးထဲမှ ရေများ ခနလေး ခမ်းသွားတတ်ပါတယ်
• ဖက်ထုတ်ပေါင်းချိန် ၂၅မိနစ်လောက် ပေါင်းပေးပြီးရင် ရပါပြီ
• အရသာရှိလွန်းသော ပုဇွန်ဖက်ထုတ်ပေါင်းကို နှစ်သက်ရာ အချဉ်ဖြင့် တွဲဖက်ကာ စားသုံးနိူင်ပါပြီ။