ပိန်းရိုးဟင်းခါး ပူပူလေး သောက်ချင်တာနဲ့ ဒီနေ့တော့ ငါးခပ်သေးသေး တစ်ကောင်ကို ပြုပ်ပြီး အရိုးအသား သပ်သပ်စီ ထွင်ပေးကာ အသားလေးတွေနဲ့ဘဲ ဟင်းခါးတစ်မယ် ချက်ထားပါတယ်။
ဒီနည်းလေးကတော့ မာမာ့အမေ မာမာတို့မောင်နှစ်မတွေကို အမြဲတမ်း ချက်ကျွေးတဲ့ နည်းလေးပါ ဒါကြောင့်မို့လို့ ဒီတစ်ခါတော့ အမေ့နည်းအတိုင်း မာမာပြင်ဆင်ပြီး ချက်ထားတဲ့ ဟင်းခါးချက်နည်းလေးကို မျှဝေလိုက်ပါတယ်ရှင်။
ပါဝင်ပစ္စည်းများ
- ပိန်းရိုး - ၆ချောင်း
- ငါး - ခပ်သေးသေး တစ်ကောင်
- ငံပြာရည် - ထမင်းစားဇွန်း တစ်ဇွန်း (ငါးပြုပ်ရန်)
- ဆား - လက်ဖက်ရည်ဇွန်း တစ်ဝက်သာသာ
- အရသာမှုန့် - လက်ဖက်ရည်ဇွန်း တ၀က်သာသာ
- ကြက်သွန်ဖြူ - အမွှာကြီးကြီး ၂မွှာ
- ငရုတ်ကောင်းမှုန့် - လက်ဖက်ရည်ဇွန်း တစ်ဝက်မရှိတစ်ရှိ
ပြင်ဆင်ပုံ
- ငါးကို မလိုတာတွေ ဖယ်ပေးပြီး ရေစင်အောင် ဆေးပေးပါ
- ဇောက်နက်သော အနေတော် အိုးထဲမှာ ငါးနှင့်ငံပြာရည်တို့ကို ထဲ့ပေးပြီး အရသာဝင်အောင် နယ်ပေးပါ
- ပြီးတာနဲ့ ရေမြုပ်အောင်ထဲ့ပြီး ရေခမ်းအောင် ပြုပ်ပေးပါ
- ရေခမ်းတာနဲ့ အရိုးအသား ထွင်ပေးပါ
- ပိန်းရိုးကို အရင်ဆုံး အကြောသင်ပေးပါ
- အကြောသင်ပြီးတာနဲ့ လက်၂ဆစ်လောက် အတုံးလေးတွေ ပုံပါအတိုင်း လှီးပေးပါ
- ပြီးတာနဲ့ ရေ၂ထပ်လောက် ဆေးပေးပါ
- ကြက်သွန်ဖြူကို အခွံခွာပြီး ရေဆေးကာ ငရုတ်ကောင်းနှင့်ရောပြီး မညက်တစ်ညက် ထောင်းထားပါ
- ဇောက်နက်သော အိုးထဲမှာ ငရုတ်ကောင်းနှင့် ကြက်သွန်ဖြူမှလွဲပြီး ပါဝင်ပစ္စည်း အားလုံးကို ထည့်ပေးပါ
- အိုးတည်ထားစဉ် အိုးမကပ်စေရန် ရေအနည်းငယ်ထည့်ပြီး တည်ပေးပါ
- ပထမဆုံး လုံးရည်နဲ့တင် ပိန်းရိုးက နူးလာပါတယ်
- အိုးမကပ်စေရန် သတိထားပေးပြီး လုံးရည်မခမ်းခင် ရေမြုပ်အောင် ထည့်ပေးပြီး ပွက်ပွက်ဆူအောင် တည်ပေးပါ
- ဟင်းရည် ပွက်ပွက်ဆူပြီ ဆိုတာနဲ့ အရသာမြည်းပြီး လိုသလို ပြင်ပေးပါ
- အရသာ ပြင်ပြီးတာနဲ့ ကြက်သွန်ဖြူနှင့် ငရုတ်ကောင်းထောင်းတို့ကို ထည့်ပေးပါ
- ပိန်းရိုးဟင်းခါး အရည်သောက်ဆမ်း ဟင်းခါး ပူပူလူလူလေးကို ပြင်ပေးနိူင်ပါပြီ။
မှတ်ချက်။ ။ တချို့က ပိန်းရိုးကိုင်လျှင် ယားတတ်ပါတယ် ဒါကြောင့်မို့လို့ လက်အိတ်နှင့် ကိုင်ပေးပါ။
No comments:
Post a Comment