အရင်ဦးဆုံး marmarskitchen.blogspot.com မှာ mmlazp.blogspot.com နံမည်နဲ့ ပုံလေးတွေတင်တဲ့အခါ တစ်မျိုး မထင်ကြစေချင်ပါဘူးရှင် နှစ်ခုလုံးက မာမာ့ရဲ့ blog လေးတွေပါဘဲ အရင် mmlazp.blogspot.com က ဝင်လို့မရတော့တဲ့အတွက် blog အသစ်ဖွင့်လိုက်ရခြင်း မျှသာပါ။
မြန်မာမုန့်လေးတွေ စားချင်တိုင်း အမျိုးမျိုး ကြိုးစားပြီး လက်တည့်စမ်းကြည့်ရပါတယ် အဆင်ပြေတာတွေ ရှိသလို အဆင်မပြေတာတွေလဲ အများကြီး ကြုံရတတ်ပါတယ်။
မုန့်လုပ်တဲ့အခါ အဆင်ပြေသွားရင်တော့ မြန်မာမုန့် ကောင်းကောင်းလေး စားရတော့မယ်ဆိုပြီး ပျော်ရသလို မုန့်သားပျက်သွားတဲ့ အခါမျိုးဆိုရင်တော့ လွှင့်ပြစ်လိုက်ရရင် သမျှောစရာပေါ့ရှင်။
အခုမာမာရေးပေးတဲ့ အချိုးအစားက အချိုအရသာ နည်းနည်းပိုပါတယ် အချိုအရသာ မကြိုက်ရင်တော့ သကြားအညို (သို့) ထန်းလျှက်ခဲကကို ထမင်းစားဇွန်း နှစ်ဇွန်းလောက် လျှော့ပြီး လုပ်နိူင်သလို အချိုကြိုက်ရင်တော့ အချိုကို ပိုထည့်လို့ ရပါတယ်။
မုန့်လုပ်တဲ့အထဲမှာ သံပုရာရည် ထည့်တာကတော့ သံပုရာရည်ထည့်ရင် မုန့်ချဉ်သွားမလား ထင်မည့်သူတွေအတွက်ပါ တစ်ခါထဲ ပြောပြပါမယ် မုန့်အရသာ ချဉ်မသွားဘဲ သံပုရာရည် ထည့်ခြင်းကြောင့် မုန့်ထဲမှာ သကြားချိုးမကပ်အောင် ထည့်ခြင်းဖြစ်ပါတယ် ဒီနည်းလေးကိုလဲ ဗီယက်နမ် မုန့်လုပ်နည်းတွေမှာ တွေ့တဲ့အတွက် ထည့်ထားခြင်း ဖြစ်ပါတယ်။
သံပုရာရည် မထည့်ချင်ရင်တော့ မကပ်တဲ့ အိုးကောင်းကောင်းနဲ့ မုန့်ကျိုပေးရင် ရပါတယ် ကပ်တဲ့အိုးနဲ့ဆိုရင်တော့ သကြားနဲ့မုန့်သား ချိုးကပ်တာနဲ့တင် မုန့်လဲနည်းနည်းဘဲ ရမှာဖြစ်သလိုချိုးကပ်နံ့ကြောင့် မုန့်အရသာလဲ ပျက်သွားမှာ ဖြစ်ပါတယ်။
ထုံးရည်ကြည် ထည့်ရတာကတော့ မုန့်သားမာမာ တင်းတင်းလေး ရလာအောင် ထည့်ပေးရခြင်း ဖြစ်ပါတယ် ထုံးအရည်ကြည် ခံထားတာ ပိုနေပါက သွန်ပပြစ်ဘဲ သိမ်းထားပါ နောက်တခါ မုန့်လုပ်စားတဲ့အခါ ပြန်သုံးလို့ရပါတယ်။
နောက်တခုက မုန့်လုပ်တဲ့အခါမှ အောက်ခြေမကပ်ဘဲ အိုးအသားထူတဲ့ အိုးကိုသုံးပါ မွှေလို့ကောင်းတဲ့ သစ်သားယောင်းမ အရှည်ကို သုံးပေးရင် မုန့်လုပ်ရတာ အရမ်းအဆင်ပြေပါတယ်ရှင်။
ဒီတခါတော့ မုန့်ကျွှဲသည်းလေး လုပ်ကြည့်တာ နှစ်ကြိမ်မြောက်မှာ အောင်မြင်သွားလို့ ချိုချိုစိမ့်စိမ့် မုန့်ကျွဲသည်းလုပ်နည်းလေး မျှဝေလိုက်ပါတယ်။
ပါဝင်ပစ္စည်းများ
- ဆန်အစိမ်းမှုန့် - ထမင်းပေါင်းအိုး ဆန်ချင်ဗူး နှစ်ဗူး
- ပီလောပီနံမှုန့် - ထမင်းစားဇွန်း လေးဇွန်းအတိ
- ထန်းလျှက်ခဲ - ဆယ်ငါးကျပ်သားခန့် (သို့မဟုတ်)
- သကြားအညို - ထမင်းပေါင်းအိုး ဆန်ချင်ဗူး တစ်ဗူး
- ဆား - လက်ဖက်ရည်ဇွန်း တစ်ဇွန်းတိတိ
- သံပုရာရည် - ထမင်းစားဇွန်း နှစ်ဇွန်း
- ရေ - ထမင်းပေါင်းအိုး ဆန်ချင်ဗူး ၈ဗူး
- ထုံးရည်ကြည် - လက်ဖက်ရည်ဇွန်း နှစ်ဇွန်း
- ဆီ - အနည်းငယ် (မုန့်သားထည့်မည့် ဗူးနှင့်ဓါးကို သုပ်ပေးရန်)
- မုန့်သားထည့်ရန် - ဗန်း (သို့) ဗူး အနေတော်တစ်ခု
- အုန်းသီးမှုန့်အစို - မိမိနှစ်သက်သလောက် (သို့မဟုတ်)
- အုန်းသီး အခြောက်မှုန့် - မိမိနှစ်သက်သလောက်
- ဇောက်နက်ပြီး အိုးအသားထူကာ အောက်ခြေမကပ်သောအိုး - တစ်လုံး
- မွှေလို့ကောင်းသော သစ်သားယောင်းမ - တစ်ချောင်း
- အပူခံနိူင်သော ပလပ်စတစ်ဗူး - တစ်ဗူး
အုန်းသီးအခြောက်ကို ပျော့သွားအောင် နှပ်ပေးရန်
- အုန်းသီးအခြောက်မှုန့်ကို သုံးမည်ဆိုပါက အုန်းသီးအခြောက်မှုန့် မိမိနှစ်သက်သလောက်ကို ရေနွေးပူပူ အနည်းငယ်ထည့်ပြီး အုန်းသီးခြောက် ပျော့သွားအောင် နှပ်ထားပေးပါ။
ထုံရည်ကြည်စိမ်ရန်
- ကွမ်းစားထုံး ထမင်းစားဇွန်း တဇွန်းကို ဗူးတခုထဲထည့်ပြီး ရေထမင်းစားဇွန်း ၅ဇွန်းနှင့်ဖျော်ထားပါ
- တညသိပ်လောက် ထားပြီးပါက အပေါ်ယံ အရည်ကြည် တက်လာသော ထုံးရည်ကြည်ကို သုံးပါမယ်။
- ပိုနေသော ထုံးရည်ကြည်များကို နောက်တခါ ပြန်သုံးလို့ရအောင် သိမ်းထားပါ
ပြင်ဆင်ပုံ
- ဆန်မှုန့်နှင့် ပလောပီနံမှုန့်ကို ဇလုံထဲထည့်ပြီး ရေပေါင်းအိုးဆန်ချင်ဗူး လေးဗူးနှင့် ပျော်သွားအောင် မွှေတံနှင့် ဖျော်ထားပါ
- ပါဝင်ပစ္စည်းများကို အဆင်သင့် ပြင်ထားပါ
- မုန့်သားထည့်မည့် ဗူး (သို့) ဗန်းကိုဆီသုတ်ထား
- ဇောက်နက်ပြီး မကပ်သော အိုးကြီးကြီး တလုံးထဲမှာ ဆား ထန်းလျှက်နှင့် ရေ ပေါင်းအိုးဆန်ချင်ဗူး နှစ်ဗူးထည့်ကာ အပူပေးပြီး ဆူအောင်ကျိုပေးထားပါ
- ထန်းလျှက်ပျော်လာတာနဲ့ ထန်းလျှက်ထဲမှ အမှိုက်များကို ပိတ်စပါးပါးလေးနှင့် စစ်ပေးပါ
- ပြီးတာနဲ့ ထန်းလျှက်ရည် ကျိုသော အိုးထဲကို ထန်းလျှက်ပြန်ထည့်ပေးပါ
- ပြီးတာနဲ့ မီးဖိုပေါ် ပြန်တင်ပေးပြီး ဆန်မှုန့်ရေဖျော်ထားတာကို ထည့်မွှေပေးပါ
- ပြီးတာနဲ့ ထုံရည်ကြည်နှင့် သံပုရာရည်တို့ကို ထည့်ပေးပြီး အဆက်မပြတ် မွှေပေးပါ
- မွှေနေရင်းက မုန့်နှစ်ရည် ပိုပြီးပြစ်လာခဲ့ရင် ရေ ထမင်းပေါင်းအိုး ဆန်ချင်ဗူးနှစ်ဗူး ထပ်ထည့်ပေးပြီး မုန့်သားပျစ်လာတဲ့အထိ ဆက်မွှေပေးပါ
- မုန့်သားနောက်တခါ ထပ်ပြစ်လာတာနဲ့ ရေထမင်းပေါင်းအိုး ဆန်ချင်ဗူး ၂ဗူး ထပ်ထည့်ပြီး မွှေပေးပါ
- မွှေနေရင်းက မုန့်သားပျစ်လာပြီး မုန့်သားအရောင် ကြည်လာပြီဆိုရင် ဆီသုတ်ထားသော ဗူး (သို့) ဗန်းထဲကို သွန်ထည့်ပေးပါ
- မုန့်သားကို ညီအောင်ညှိပေးပြီး အအေးခံပေးပါ
- မုန့်သားအေးလာပြီဆိုမှ ဓါးကိုဆီသုတ်ပေးကာ မိမိနှစ်သက်သလို လှီးပေးပါ
- လှီးထားသော မုန့်ကျွဲသည်းကို ပန်းကန်တစ်ချပ်ထဲထည့်ပြီး အုန်းသီးမှုန့် ဖြူးပေးကာ မုန့်ကျွဲသည်းမုန့် ချိုစိမ့်စိမ့် မွှေးမွှေးလေးကို စားသုံးနိူင်ပါပြီ။
- မုန့်ကျိုချိန် စုစုပေါင်းပျှမ်းမျှ မိနစ်၂၀လောက် ကြာပါမယ် အသုံးပြုသော မီးအနေအထားအပေါ် မူတည်တဲ့အတွက် မုန့်သားကျိုချိန် အနည်းငယ် ကွာခြားနိူင်ပါတယ်။
No comments:
Post a Comment